拍肘手
Posted By: 何基 (Ho Kay)
Category: Chum Kui | Views: 1457 | Replies: 0
Sun Aug 01, 2004 9:35 am
賢仔,雙攔手轉馬己前述,不再重複,現從“拍肘手”講,你在做此動作時,放鬆手,大大力拍向內肘位,聲就夠大,但手法,發力,位置及意識都係……錯!所以有晚在會堂練習時我特別請師父親自示範此手法,師父話用呢下手應該係右手“抌”下,左手同時“托”上,雙手指尖同樣向前才對,所以你左手指尖向前,右手指尖向左拍內肘就錯喇,還有並不是放鬆手去拍,而係兩隻橋手都要蓄勁,勿以為此招表面係“打斷”人橋手,實際仲係練習一隻係“抌手”“窒手”發勁,一隻係“托掌”“登掌”發勁,同樣係練習“肘底力”及短勁運用。隨後打三掌輝仔你就求求其快快打出,拖坭帶水全不勁也不對,應清楚地一下一下打出正掌,力發短勁,臂要直,不用太快,這是掌勁練習。跟住單攔手轉馬,此時手、腰、馬皆要蓄勁,不過此感覺你自己才知道,外表看來,你仍然全身放鬆,並無僵硬谷力之感。“嘩,師兄,好難做!”當然啦,尋橋乃我詠春中級拳套,每一下手法嚴格要求正確運用及為何如此用,要長期練習研究架。拿,只要手法位置正確,則整過架構自然會表現出“有勁”感覺。“係點?”係點?你睇你轉馬時身搖擺不定,抽拳無力,攔手似膀手,腕指下垂,垂頭眼望手,屁股突出坐馬,重心不準,整個架式予人無力感,勿以為集体上堂跟師父練下就話學識尋橋假,仲差好遠呀!咪掛住成晚黐手,應該三兩師兄弟間中走埋一邊,互相研究手法正不正,唔識就問師父或班大師兄,至係醒目仔架!好,先教下你地攔手轉馬啦,以右手開始,打完第三掌右手貼身轉馬成橫攔手,記住整個架式此時應該係右上臂與前臂成九十度,手掌和前臂同一直線,手指要緊密平直成掌形,咪“耍”開兼下垂呀,隻手掌秒秒鐘要劈人架,左手緊握成抽拳貼胸側,勿放在腰側甚至肚皮!頭正直眼望前,腰要直勿寒起背,屁股要收勿突出來,重心在左腳,右腳虛踏至剛可踢起為止,雙腳指均成四十五度,此時全身應自然地蓄了勁,借九十度膀手轉馬(面向計)將勁力釋放出去,記住係借膀手轉馬將勁力釋放出去,並非用膀手“硬隊” “硬迫”出去!既鬆了勁,膀手馬應全身放鬆擺定。如是左右手方向各做三次,練習蓄鬆勁運用。“嘩估不到第一節尋橋都這樣複雜呢!”複雜?還有手法呢,手法位置正確否、精神面貌及控制節奏等對成個拳套打得好唔好都好大影架!“咪住,等我地練多一兩個月第一節尋橋至講其他啦,師兄!”好,下次至講。


The Trackback URL for this entry is: http://www.wingchunland.com:/trackback.php?eid=13
 
  © Copyright 2012 Wing Chun Land. All rights reserved.